< 唔 check 唔知身體好 >


Helen

['mediPr]

唔 check 唔知身體好

有時覺得都係做男人好, D 女人嘢真係好鬼奄悶。

2018 年有感一把年紀都未做過 breast screening, 於是走去做 USG 同 MMG, 竟發現左邊乳房有五粒嘢, 抽粗針, 解決, 但之後無去 follow up。

今年 CNY 前有日沖涼摸到粒嘢。初時以為係自己職業病神經過敏,於是連續幾日反覆咁摸 (連仔女都問我做咩成日自摸?),都係覺得有粒嘢,所以預約咗今日去見醫生,仲 lucky 到可以即日做埋 USG, 3D MMG 同抽粗針。

因為已經唔係第一次抽針, 而且咁啱今次幫我抽針嘅又係上次嗰位醫生 – 上次抽完我私下同 friends 講, 高手係殺人不見血嘅,塊膠布真係一滴血都無。痛唔痛? 打局部麻醉時係有好少好少嘅唔舒服,完全可以接受, 而且好快已經無感覺。

抽嗰三下其實一 D 都唔痛, 我諗好多人驚係因為聽到 “啪啪啪” 的聲音, 係驚多過痛。其實醫生每一下準備抽之前都有提醒會 “啪” 一聲, 有晒心理準備㗎!

今次抽可能自己更加放鬆, 加上貼心的服務, 感覺比上次更好 (我係咪黐線㗎?捱針都話感覺好?)。不得不讚係張床竟然舖咗暖毯,張被冚唔到腳掌姑娘返轉頭幫我冚住對腳, 見我無 (口) 罩用仲私人醒我兩個 – 一個即用, 另一個幫我用信封裝住。醫生好細心畫晒公仔解釋 – 原來我左邊乳房有成六粒嘢, 其中一粒係新嘅, 另外有一粒之前已經有, 但 size 大咗, 醫生仲讚我叻,自己摸到 (呵呵,又自我感覺良好?)。

我個人係行動型同解決問題型,所以一日裡面做晒要做嘅嘢,感覺更加良好?唔該晒兩位醫生 (幫我安排嘅同幫我抽針嘅)!

女士們真係要注重乳房健康, 花少少時間同少少錢, 換少部手機, 買少個包包, 買個安心才最重要。噢!忽然有靈感 – 頭條專欄就寫番篇乳房檢查啦!

(註: 不是廣告也沒有收佣金)


唔 check 唔知身體好